الرئيسية
الى حواء
الدنيا حر والجو نار يا حبيبي نار ....
وأكيد طبعا قمرات قمر 14متضايقين قووووي وعندهم مشاكل كتيييير بسبب الحر والشمس اللي شادة حيلها معانا الصيف ده صح....
وعلشان قمر 14 معود دائما كل قرائه الأعزاء إن مفيش مشكلة إلا وليها حل..
قررنا إننا نعمل العدد الجامد ده علشان نقدم فيه شوية نصائح للمشاكل اللي ممكن إنها تقابلنا وازاي إننا نحلها بسهولة جدا جدا جدا من غير أي أضرار
المشكلة الأولى
العناية بالبشرة
أنا عارفة إن دي أهم مشكلة بتهم كل البنات وخلال الفترة اللي فاتت جات إلينا العديد من الرسائل إن فيه ناس بشرتهم اتحرقت من الشمس أو اسمرت شوية نتيجة التعرض للشمس سواء كان التعرض ده نتيجة إن ظروف عملهم بتتطلب منهم الخروج اليومي أو لأنهم لسه راجعين من المصيف ونفسهم بشرتهم لونها يرجع زي الأول علشان كده ياريت إنك تاخدي بالك من شوية النصائح دي:
1. حاولي على قد ما تقدري إنك تبعدي بشرتك عن التعرض المباشر لأشعة الشمس خاصة في الفترة من الساعة 11 صباحا إلى الساعة 4 عصرا...
لو مضطرة قوووي وهتتعرضي للشمس يبقى ياريت إنك تضعي كريم للوقاية من أشعة الشمس وده هتلاقيه في الصيدليات بس خدي بالك إنك تختاري النوع المناسب لبشرتك وتحطيه على وشك وإيديكِ قبل الخروج من المنزل بربع ساعة.
2- إيه رأيك كمان لما تخلي الكام شهر بتوع الصيف دول فرصة إن بشرتك تستريح من المكياج أو على الأقل تقللي من وضع المكياج على بشرتك في فصل الصيف وده لأن فيه أنواع كتير من المكياج بيكون فيها مواد كيميائية ضارة بتتفاعل مع أشعة الشمس وممكن إنها لا قدر الله تسبب لك حساسية للجلد اللي بتظهر على شكل بقع بنية. كمان خدي بالك إنك ما تحطيش بارفان على جلدك وتتعرضي للشمس.
3- يا ريت إنك تبعدي نهائيا عن كريمات التفتيح وما تسمعيش كلام حد يقول لك إن الكريم ده مفعوله هايل لأن ببساطة شديدة جدا كل كريمات التفتيح دي مضرة جدا جدا للبشرة وده لأنها بتحتوي على مواد بتتفاعل مع الشمس وممكن إنها لا قدر الله تصيبك بسرطان الجلد نتيجة كثرة استخدامها.
خدي بالك
طبعا احنا عارفين إن لكل نوع من أنواع البشرة طريقة خاصة في التعامل علشان كده هاقول لك ازاي إنك تنظفي بشرتك على حسب نوعها.
أولا البشرة الدهنية
لصاحبة البشرة الدهنية ياريت إنك تغسليها ثلاث مرات يوميًّا باستخدام الماء والصابون المناسب لنوع بشرتك. علشان تتخلصي من الدهون الزائدة اللي بتترسب بمسام الجلد وتسدها.
ثانيا البشرة الجافة
طبعا لأن البشرة دي بتتميز بالجفاف فتلاقي إنه من المناسب جدا إنك تغسلي وشك مرة واحدة أو مرتين على الأكثر يوميًا بالمية الباردة بدون صابون علشان الصابون هيزود جفاف البشرة.. ولو هتستخدمي صابون ياريت إنك تختاري الصابون اللي بيحتوي على زيوت زي زيت "الزيتون" أو" الجلسرين"....
كمان ياريت إنك تغسلي وشك بالمية الباردة أو الفاترة وتجنبي نهائيا استخدام المية السخنة في غسيل وشك لأنها ببساطة بتؤدي إلى زيادة جفاف البشرة.
ثالثا البشرة العادية
ودي كفاية إنك تغسليها مرة في الصبح ومرة بالليل باستخدام صابون بيكون بيحتوي على زيوت طبيعية زي زيت جوز الهند أو زيت الزيتون.
إيه رأيك؟
إيه رأيك كمان إنك آخر اليوم بعد ما ترجعي من شغلك أو بعد ما ترجعي من المصيف إنك تعملي ماسكات طبيعية مغذية وملطفة وبتساعد على تفتيح البشرة ويبقى بكده إنت ضربتِ أكتر من عصفور بحجر واحد..
يلا نشوف مع بعض..
ماسك بياض البيض
والماسك ده مناسب جدا لأصحاب البشرة العادية
المكونات :
• بياض بيضة.
• عصير نصف ليمونة.
الطريقة :
اخلطي المكونات دية كلها مع بعض جيدا وبعد كده ادهني بيها وشك بفرشاة وبعد مرور ربع ساعة أغلسي وشك بالمية الباردة، كرري الماسك ده مرتين أو ثلاث مرات في الأسبوع وهتشوفي النتيجة بنفسك.
ماسك عسل النحل بالخميرة
والماسك ده مناسب جدا لأصاحب البشرة الجافة
المكونات:
• معلقة عسل نحل.
• معلقة لبن حليب طازج.
• خميرة بيرة.
الطريقة:
اخلطي المكونات دي كلها مع بعضها جيدا وبعد كده ادهني بيها وشك بفرشاة بس خدي بالك إنك تبعدي نهائيا عن منطقة العينين وبعد كده سيبيه على وشك لمدة ربع ساعة وبعد كده اغسلي وشك بالماء الدافئ.. ممكن تعملي الماسك ده مرتين في الأسبوع وهتشوفي النتيجة بنفسك.
ماسك اللبن بالدقيق
والماسك ده لأصاحب البشرة الدهنية
المكونات:
• 3 ملاعق دقيق.
• مقدار مناسب من اللبن الحليب.
• عصير ليمونة.
الطريقة :
اخلطي كل المكونات دي مع بعضها كويس لغاية ما تكون على شكل عجينة لينة وبعد كده حطيها على وشك لمدة 20 دقيقة وبعد كده اغسلي وشك بالماء الدافي كرري الماسك ده لمدة يومين في الأسبوع وابقي قولي لنا على النتيجة.
دي كانت الحلول لأول مشكلة من المشاكل اللي ممكن إنها تقابلنا في الصيف
يلا نشوف المشكلة التانية وحلول ليها كمان
المشكلة الثانية
العناية بالشعر
طبعا كلنا بلا استثناء بنعاني من المشكلة دي وهي إن شعرنا في فصل الصيف بنلاحظ إنه مكسر وإنه بيفقد الكتير من لمعانه وبريقه نتيجة الحر والرطوبة والعرق...
بس ولا يهمك أنا هقول لك على شوية نصائح ممكن إنك تاخدي بالك منها وهي:
1- احرصي على غسيل شعرك مرتين في الأسبوع باستخدام الشامبو والبلسم المناسب لنوع شعرك لأن غسيل الشعر يوميا بيؤدي إلى أن الشعر بيفقد لمعانه وحيويته كمان خدي بالك إنك تستخدمي الشامبو المناسب والبلسم المناسب لنوع شعرك.
2- يا ريت إنك تستعملي خلال فصل الصيف الزيوت الطبيعية زي "زيت جوز الهند وزيت الزيتون" لأنها بتساعد على ترطيب شعرك خاصة لو كان شعرك من النوع الجاف وكمان يا ريت إنك تعملي حمام زيت لشعرك وليكن حتى مرة في الأسبوع.
ودول طريقتين لعمل حمام الزيت وإنتِ اختاري الأسهل لك
الطريقة الأولى
الخطوة الأولى:
قسمي شعرك لأربعة أجزاء.
الخطوة التانية:
حطي الزيت على فروة رأسك ولغاية أطراف شعرك وخلي كل قسم لوحـده حتى نهاية الرأس.
الخطوة التالتة:
اعملي مساج خفيف لفروة الرأس علشان تتأكدي من وصول الزيت لجميع أجزاء الشعر.
الخطوة الرابعة:
غطي شعرك ببونيه الشعر لمدة عشرين دقيقة.
الخطوة الخامسة:
ودي آخر خطوة وهي إنك تغسلي شعرك بالمية الفاترة وبعد كده بشامبو وبلسم مناسب لنوع شعرك.
الطريقة الثانية
الخطوة الأولى:
قبل ما تبدئي في عمل حمام الزيت دلكي فروة رأسك بأصابع إيدك.
الخطو ة التانية:
سخني الزيت الموجود عندك عن طريق وضع زجاجة الزيت في إناء به ماء مغلي وحطي الزيت على رأسك.
الخطوة الثالتة:
هاتي فوطة مبلولة بالمية السخنة واعصريها كويس ولفي بيها شعرك.
الخطوة الخامسة:
سيبيه على رأسك لمدة أربع ساعات وبعد كده اغسلي شعرك بالشامبو والبلسم المناسب.
3- ابعدي نهائيا عن الصبغات والسشوار خلال فصل الصيف لأنها مضرة جدا جدا على الشعر ده غير إنها مش هتقعد كتير في شعرك نتيجة زيادة كمية العرق في فصل الصيف.
4- لو كنتِ في المصيف يا ريت إنك ما تنزليش المية بشعرك البسي بونيه على شعرك علشان المية المالحة.
5- ساعات كتير نتيجة الحر وإنك مش بتهوي شعرك كتير ممكن إنه يظهر حبوب علشان كده ياريت إنك تهوي شعرك باستمرار وإنتِ في البيت يعني بلاش موضوع إنك تعملي كحكة باستمرار يعني افرديه شوية، اعمليه ضفيرة شوية، اعمليه ديل حصان؛ يعني من الآخر دلعيه وبلاش تحبسيه..
ولو ظهرت مشكلة الحبوب دي يبقى العلاج إنك تعملي حنة لشعرك مرة في الأسبوع وعلى فكرة الحنة مفيدة جدا للشعر لأنها بتغذي وتنعم الشعر..
المشكلة الثالثة
العناية بالعيون والرموش
أولا العناية بالعين
في فصل الصيف بتكتر الشكوى من أمراض العيون اللي ممكن إنها تحصل نتيجة التعرض المستمر لأشعة الشمس أو إن العرق بينزل فيها ويسبب حرقان ودموع واحمرار العين وعلشان تتفادى مشاكل العيون خدي بالك من شوية النصائح دي:
1- احرصي خلال فصل الصيف إنك تلبسي نظارة الشمس وما تحاوليش إنك تبصي للشمس مباشرة.
2- لو حاسة إن فيه هالات سودة أو احمرار في عينك يبقى الحل إنك تعملي كمادات شاي على عينك أو إنك تغسليها بمية باردة.
3- لو كنتِ من الناس اللي طبيعة عملها بتتطلب الجلوس باستمرار أمام الكمبيوتر يبقى يا ريت إنك بين كل ساعة إنك تاخدي 5 دقائق تغمضي فيها عينك وتريحيها.
4- يا ريت إنك تمنعي الماسكرا في فصل الصيف.
5- بلاش إنك تسهري بالليل لأن السهر ده هو عدو العين الأول واللي بيخلي عينيك شكلها مرهق.
كمان خدي بالك
إن نظارة الشمس اللي هتلبسيها تكون ماركة معروفة وبلاش موضوع نظارات الشمس اللي بتتباع في الشوارع دي لأنها بتضر العين جدا ومش بتفيدها وده لأنها بتكون مصنوعة من مواد بتسمح بمرور الأشعة فوق البنفسجية اللي بتضر العين وبالتالي بيكون عدم وجودها أحسن.
ثانيا العناية بالرموش
وهتلاقي إن في الصيف رموشك بدأت إنها تتساقط من الحر والعرق وعلاج المشكلة دي بسيط جدا جدا كل الحكاية إنك قبل ما تنامي تداومي على تغذية رموشك بزيت اللوز أو زيت الخروع أو زيت الزيتون... لأنهم مغذيين جدا جدا للرموش بس خدي بالك إن الزيوت دي ما تلامسش عينكِ يعني للاستخدام الخارجي فقط..
ا للتيك أواي 
» من نتائج المعصيـــــــة
» بسيطلات فردية عاد خرجتها من الفران
» الكيك المحروق
» كرواصون عادي
» من غير ولا نقطه .... يلا جاوب
» ترى من يكون؟؟؟!!!
» لمن تهدي هذه العبارة ؟؟؟
» هام جدا (( سارعى بالدخول حواء ))
» التقشير